第二章
佢地各有各ge房間，兩個人都差唔多七十幾歲，或者可能唔止添。但佢地仍然好享受生命──當然已經老到剩返半條人命啦。我知道咁講聽落有d刻薄，但係我無惡意。我意思只係，我以前成日都會諗起斯賓塞先生，而如果你同我一樣為佢憂心太多，你就會驚嘆佢究竟仲為乜撚野而生存。佢己經駝哂背，老態龍鍾，上堂果陣，每當佢跌左支粉筆，坐第一排ge人就成日都要起身幫佢執再遞返比佢。對我黎講，咁樣實在太糟糕。但如果你只係關心佢而唔好諗得太多，你會發現其實佢ge情況都唔係太差。譬如話，有次星期日，我同幾個同學去佢屋企飲熱朱古力，佢拎左一張殘殘舊舊ge瓦族毛氈比我地欣賞，張氈係佢同斯賓塞太太o係黃石公園同個印度人買。所以你話呢，你以為一個人好撚老就會慘不忍睹，好似斯賓塞先生咁，但佢地可以因為買到一張咁ge毛氈而興奮莫名。
佢對門開住左，但係我都扮下野敲下門，當係禮貌都好啦。我睇到佢坐左o係邊，佢坐左o係一張好大ge皮凳，用我頭先講過果張顫包住個身，我敲門果陣佢望過黎問︰「邊個呀？」佢大嗌，「係咪候登？入黎啦。」佢成日都大嗌，有時會搞到我神經緊張。
就o係我踏入佢間房之際，我有d後悔我黎左。佢睇緊大西洋月刊，周圍擺滿哂藥丸藥水，成間房瀰漫住一陣萬秀雷敦薄荷膏味，實在令人沮喪，雖然係咁，其實我唔係特別討厭病人。令人更沮喪ge係，斯賓塞先生著住一件舊到無倫ge浴袍，唔講仲以為佢出世果陣就已經用緊件浴袍。老實講我真係唔多想見到一個老人家著住睡衣又或者浴袍，佢地胸口總係會露出一節節骨慘慘ge肋骨。仲有對腳，老人家對腳，特別o係沙灘上見到果d，望落去總係光脫脫白sai sai。「Hi斯賓塞老師。」我講，「我收到你張紙仔，多謝哂你。」佢o係張紙仔上面寫，叫我o係假期開始前去一去佢屋企講聲再見，因為恐怕我都唔會再返黎。「其實你唔駛寫紙仔比我嫁。你唔寫我都一樣會照黎同你講聲再見。」
「坐低先啦。候登。」老斯賓塞講。佢意思叫我坐o係張床。
我坐低左。「你感冒好返未呀老師？」
「候登，如果真係好嚴重ge話，我會去睇醫生嫁啦。」佢講，話口未完佢就開始咳到痴肺。佢咳左一陣之後終於坐直返個人，繼續講︰「點解你唔落場比賽？我記得今日好似係大賽ge日子喎。」
「係呀，我去過睇啦。只係咁o岩睇到，因為我同劍擊隊d人o岩o岩先由紐約返黎。」我想同你講，佢張床仲硬過石頭。
佢開始變得好撚認真，我就知道佢會咁。「你係咪就快離我地而去？嗯？」
「係呀，老師。我諗應該係。」
佢開始上左鏈咁不停點頭。你永遠唔會見到有人好似斯賓塞咁樣不停點頭，你亦永遠唔會知道究竟佢不停點頭係因為佢諗緊野，定係因為老到懵懵地。
「塞穆爾博士同你講過d咩？我記得你地曾經傾過計。」
「係呀我地傾過計，我地真係傾過，我估我坐左o係佢辦公室兩粒鐘。」
「佢同你講乜？」
「噢……佢話，人生就好似一場遊戲之類之類，你要跟規則去玩。其實佢講得幾好。我意思係，佢無發哂火咁講野。佢只係不停咁講人生係場遊戲之類之類，你明啦。」
「人生的確係一場遊戲，候登。玩ge人都要跟從遊戲規則。」
「係，無錯，老師，我知道係咁，我知道。」
遊戲，攞命。如果你係企o係高手雲集果一面，咁咪係遊戲囉，我認同。但係如果你企另一面，咁你話呢個遊戲點玩呢？無，無野好玩。「塞穆爾博士寫左信比你父母未？」斯賓塞問我。
「佢話佢星期一會寫。」
「你自己有無同佢地溝通過？」
「無呀老師，我仲未同佢地講，因為我星期三返屋企都應該會見到佢地。」
「咁你覺得佢地知道會點？」
「嗯……佢地應該會好嬲，」我講，「佢地一定會，le間已經係我返過第四間學校。」我搖一搖頭。我成日都搖頭。「攞命！」我講，我成日都講「攞命」，一方面我d詞彙太糟糕，另一方面係因為咁樣睇落後生d。之前十六歲，而家十七歲，但有時我ge言行舉止好似十三歲咁，其實幾諷刺，因為我成六呎二吋半咁高，又生白頭髮，無厄你。我個頭其中一面──右面──生滿哂白頭髮，幾百萬條都有，細細個就已經有。即使係咁我仍然好似一條死o靚仔咁款，個個都係咁講，特別係我老豆。其實佢地o岩ge，不過o岩唔哂，d人永遠自以為是，我先唔撚在乎，只係當佢地叫我成熟d做返個我ge年紀應該做ge野時會有d唔耐煩。老實講有時我都好老成，只係d人唔察覺，d人硬係乜都察覺唔到。
斯賓塞又開始猛咁點頭，佢仲開始撩鼻屎。佢以為撩一撩就唔多覺，其實我見到佢成隻手指公已經塞左入個鼻哥窿。我諗佢可能覺得咁做無問題，因為得我一個o係佢間房。我唔介意ge，只係望住人撩鼻屎真係有d嘔心。
跟住佢就講，「幾個禮拜前你父母同塞穆爾博士會面時，我有幸見佢地一面。佢地係好
第六章
有d野好難記住。而我o係道諗緊究竟史幾時同Jane約會完返黎。我意思係，我醒唔起當我聽到走廊傳黎條友蠢鈍ge腳步聲時，我究竟做緊乜。我好可能依然凝望窗外，但我真係唔q記得。可能我真係好撚愁，先咁樣。當我好愁一d些ge時候，我唔可以坐定定，我甚至想去沖個涼。不過我都係無去，因為我太愁啦。我唔想打擾自己ge愁緒。如果你知道史ge為人，你都會好似我咁憂愁。我試過幾次同佢加埋d女仔去玩，就知道佢味野。條友真係好仆街，真係。
雖然走廊鋪左地氈，但你仍然會聽到條友行緊返房ge腳步聲。佢入房果陣，我連我坐左o係邊我都唔記得－－窗邊？我張凳？佢張凳？我發誓我真係唔記得。
佢入黎果陣就怨出面好鬼凍。跟住佢話︰「頂你d人呢？殮房咁撚樣ge？」我答都無答佢，心諗佢係咪蠢撚到連而家係星期六晚，所有人都走哂或者訓左教又或者返左屋企都唔知？佢開始除衫，但係關於Jane佢就係一隻字都唔撚提，一隻字都無。我都無提，我靜係望住條友。佢就靜係同我講多謝，多謝我借件格紋jacket比佢。佢掛件jacket o係衣架，然後放返去衣櫃裡面。
當佢除緊條tie果陣，佢問我有無幫佢寫撚左佢要交果篇文，我話篇文就放撚左o係佢張床上面。佢走過去拎，一路除衫鈕一路睇篇文。佢企o係道，一路睇住，用手作狀揼落胸肌同肚道，個表情真係好on9。條友成日都好鍾意揼自己胸肌，自戀到爆。
突然，佢話︰「唔撚該你呀阿候登！你寫撚左一篇講棒球手套ge文囉。」
「咁又點？」我好撚冷淡咁講。
「屌！咩叫咁又點？我都同你講過篇文係要寫一間房或者一間屋之類ge野嫁啦！」
「你話要寫d 描述性 ge野。寫棒球手套有乜撚野分別？」
「我屌！」條友好撚火，真係嬲到爆。「你成撚日都幫倒忙ge！」佢啤住我。「怪唔之你比學校革扯。」佢講。「你由始至終都無做撚好過一件事，我老實同你講，一件都做唔撚到。」
「無問題，咁比返篇文我」我講，我行埋去，從佢手上搶返篇文，然後撕爛佢。
「你咁撚樣做為乜姐？」佢講。
我無答佢，我靜係扔d紙碎落垃圾筒。然後，我就攤o係我張床道，我同佢兩條友都dead air dead左好耐。佢除哂衫，靜係住條孖煙通，我o係張床道點起一支煙。宿舍入面唔比人食煙，但係夜晚d人訓哂又或者出左去無人聞到其實可以食。我食，係為左激起史把火，條友好唔鍾意人犯校規。所以佢從來唔會o係宿舍食煙，靜係我先會。
佢仲係提都唔提下Jane。所以最後我終於講︰「如果Jane請假靜係可以請到九半，你返黎都返得算好撚遲下喎。你係咪搞到佢遲左返公司？」
條友坐o係床邊剪腳甲。「佢遲左幾分鐘姐。」佢話。「邊個想禮拜六晚九點半就返公司？」天呀，我真係好憎佢。
「你有無去到紐約？」我講。
「你癲左牙？佢請假請到九點半我地點撚樣夠時間去紐約呀？」
「咁無計啦。」
佢望住我。「聽住，」佢話，「如果你要食煙，不如去留下會客室食好唔好呢？你可能就快革扯但係我仲要留o係道直到畢業。」
我無理佢，我真係無理到，繼續喪chur煙。我靜係轉個身，睇住佢剪腳甲。乜q學校黎嫁？你永遠要成日睇住d人剪腳甲又或者擠暗瘡之類。
「你有無幫我同佢say聲hi？」我問佢。
「有呀。」
屌我真係信佢有呀，條仆街。
「咁佢點講？」我講。「你有無問佢係咪仲係將d 皇帝棋放哂o係最後排原封不動？」
「無，我無問佢。屌，你覺得我地成晚做咩－－捉棋牙？攞命。」
我答都無答佢，天呀我真係好憎佢。
「如果你無去紐約，咁你同佢去左邊？」隔左陣，我問佢。我把聲震到幾乎控制唔住，我變得緊張起黎。有種感覺，呢單野會變得有趣。
佢剪完腳甲，企左起身，靜係著住條底褲，好似想玩野咁。佢行去我張床，成個身一野壓落我膊頭道，好似好撚好玩咁。「唔好搞啦。」我講。「如果你無同佢去紐約咁去左邊？」
「咩地方都無去。我地靜係坐住o係架車道。」佢又好撚好玩咁一野壓埋黎。
「唔好搞啦，」我講，「架車邊個嫁？」
「班克。」
班克係Pency籃球隊ge教練。老史係佢隻狗，因為佢係球隊重心成員，所以班克成日都俾佢借車。一般學生係唔俾借教職員ge車，但係d仆街運動員永遠都圍威喂。我去過ge所有學校，d仆街運動員都係三五成群玩埋一堆。
史仲係o係道亂9咁搞。佢渣住支牙刷，塞入個口，「咁你地o係架車搞乜呢？」我問。
「係咪迫佢坐o係架車道？」我把聲好似震得仲勁左。
「你講乜q呀，係咪要我用番梘幫你洗洗個口。」
「係咪搞左？」
「老友，le d野係職業機密。」
接住落黎ge情況我都講唔清楚啦。我靜係知我企左o係身，好似要出去會客室咁樣，然後我想打9佢，用盡奶力，朝住佢嘴果支牙刷打落去，想用佢支牙刷插穿佢個喉嚨。但係我打唔中，只係打中左佢個頭ge唔知邊一忽。好有可能令佢痛左一下，但係唔係我想像中咁樣。其實本應可以打到佢開花，但我都同你講過，我右手受過傷，握唔緊。
點都好，之後我所知道ge野就係，我訓撚左落地下同埋佢坐左o係我胸口上面，佢塊面紅哂。佢用膝頭壓撚住我胸口，成噸咁重。又扭住我手腕，所以我打唔到佢。我真係想殺死佢。
「你到底發生乜撚野事呀？」佢不停講，塊面愈黎愈紅。
「拎撚開你個膝頭。」我同佢講，我幾乎係嗌出黎。「快d，鬆開我，你條仆街。」
佢置之不理。一直扭住我手腕，我一直鬧佢仆街，好似鬧左十粒鐘咁。我幾乎醒唔起同佢講左d乜。我記得我好似話過，佢以為自己可以想搞邊個就搞邊個，我又講過，佢根本唔在乎一個女仔捉棋果陣會唔會將皇帝棋放到最後排與否，而佢唔在乎係因為佢係一條撚樣。佢最憎人話佢撚樣。所有撚樣都好憎俾人話佢係撚樣。
「收聲啦，候登。」佢塊面紅撚哂。「而家就即刻同我收聲。」
「你甚至乎唔知道佢個名係Jane定係Jean，你條撚樣。」
「而家，收聲，候登－－我警告你。」佢講，睇黎我真係惹起佢把火。「如果你再唔收聲，我就打你一獲甘。」
「拎開你個死人膝頭啦。」
